Vindafjord Arbeiderparti vil:

Vindafjord Arbeiderparti til: 

• Arbeida for gode offentlege tenester til innbyggarane.
• Sørga for at vedtaka som blir gjort sikrar ein god og trygg kommuneøkonomi framover.
• Sikra at det er godt samspel mellom politikk, administrativkommuneleiing og dei tillitsvalde.

Ein attraktiv kommune å flytta til

Kommunen har i dag større innpendling til arbeidsplassar enn utpendling. Kommunen må gjerast attraktiv for dei mange som pendlar inn til kommunen.

• Kommunen skal ha ansvaret for den kommunale bustadpolitikken.Tomteselskapet sine oppgåver bør revurderast. 
• Det skal satsast sterkt på startlån, slik at fleire som elles har vanskar med å skaffa seg eigen bustad, ved hjelp av dette kan skaffa seg sin eigen stad å bu.
• Det skal vera tilgjengeleg tomter i alle bygder, og i alle felt må det vera sett av tomter til småhusbygg.
• Kommunale tomter som har ligge for sal i mange år, kan seljast til redusert pris.
• I kommunen bør det øyremerkast ei stilling som kan nyttast til service og hjelp for nytilflytta. Det skal gjevast informasjon og hjelp om startlån, ledige tomter, ledige bustader, med meir.
• Kommunen skal arbeida for god mobildekning i heile kommunen, og alle husstandar skal ha tilgang til eit godt breiband.

Ein god kommune å veksa opp i

Ved sida av heimane er barnehagane og skulane dei viktigaste stadanei barna si oppvekst. Det skal vera god kvalitet i barnehagane og skulane i kommunen. I tillegg skal den frivillige sektoren som arbeider for barn og unge ha gode rammevilkår.

Vindafjord Arbeiderparti til: 

• Barn i kommunen skal få rett hjelp til rett tid.
• Ved søskenmoderasjon skal barnehage og SFO sjåast samla, moderasjon skal gjevast på det samla tal barn familien har i barnehage og SFO.
• Betaling i barnehage og SFO skal reduserast kraftig frå tredje barn, om mogleg takast heilt bort.
• Skulane skal oppgraderast, og ein plan med langsiktig prioritering må vedtakast.
• Arbeida for at Ølen VGS blir styrka, samt motivera ungdom til å søka på denne skulen.
• Det skal arbeidast for å få på plass SLT-koordinator i kommunen, aleine eller saman med ein annan kommune.
• Sikra eit framleis fagleg sterkt barnevern.
• Det skal tilsettast kommunal psykolog, aleine eller saman med ein annan kommune.

Ein god kommune når du treng omsorg

Den eldre delen av befolkninga vil auka i åra som kjem. Dette vil setja krav til den kommunale prioriteringa. Andre grupper enn eldre vil også ha behov for ulike kommunale omsorgstiltak.

Vindafjord Arbeiderparti vil:

• Foreslå at kommunen set i gong eit grundig arbeid for å planlegga korleis eldreomsorga skal vera dei neste tiåra. Omsorgsbustader, trygdebustader, heimesjukepleie, sjukeheimar, dagsenter, med meir, må vurderast i dette arbeidet.
• Prispolitikken på utleigebustadene skal gjennomgåast.

Ein god kommune å driva næring i

Vindafjord kommune har mange flotte bedrifter. Desse må sikrast gode rammevilkår. Samtidig har kommunen ei rolle i å legga til rette for nye bedrifter og nye næringar.

Vindafjord Arbeiderparti vil: 

• Området på Dommersnes må vidareutviklast og marknadsførast. Kaien skal også i framtida vera kommunal, og inntil bedrifter kjøper areal skal området vera i kommunal eige.
• I kommuneplanen skal det setjast av område til næringsutvikling i Skjold, og kommunen bør ta initiativ til å kjøpa området.
• Det er trong for straumtilførsel for å få til det grøne skiftet. Kommunen må difor vera pådrivar for at det er nok kapasitet i straumnettet.

Ein god kommune å vera tilsett i

Det er dei tilsette i kommunen som er viktigast for at kommunen skal nå sine mål og for at innbyggarane skal få gode tenester.

Vindafjord Arbeiderparti vil:

• Kommunen sine eigne tilsette skal ha kompetanse til å gjera flest mogleg av dei kommunale tenestene.
• Dei kommunale tenestene skal utførast av kommunen. Private oppgåver skal ikkje aukast på bekostning av dei som blir utført av kommunen.
• Arbeidet for at flest mogleg av dei tilsette skal ha faste – og heile –stillingar skal fortsetja.
• Kommunen skal vera ein stor og god arbeidsplass for lærlingar.
• Kommunen vil prioritera gode ordningar for eigne tilsette som vil oppgraderakompetansen sin.

Ein god kommune å bu i

Livskvalitet består av både det me gjer på jobb og fritid. I noko av dette kankommunen og ha ei rolle.

Vindafjord Arbeiderparti vil:

• Vegvedlikehaldet i kommunen skal prioriterast høgare.
• Sikra fortsatt minst like gode ordningar for friviljug idretts- og foreiningsliv.
• Stimulera til merking og utbygging av stiar og turvegar.
• Arbeida for at flest mogleg av innbyggarane blir tilknytta offentleg vann og avløp.
• Arbeida for offentleg tilgjengelege badeplassar og båtutsettingsramper.

Påverknad av andre

Det er saker som andre enn kommunen har ansvar for, men som ordførar og lokalparti må arbeida for å få til.

Vindafjord Arbeiderparti vil: 

• Arbeida aktivt for at Solheim-Bakka får oppstart.
• Arbeida for at Sandeid fengsel blir oppretthalde.
• Arbeida for at politidekninga i kommunen minst er på nivået det er i dag, men helst blir betre.
• Halda god kontakt med fylkeskommunen for at fylkesvegnettet skal få ei oppgradering.